Nënsekretari i Përgjithshëm i Kombeve të Bashkuara për Operacionet e Paqes, Jean-Pierre Lacroix, ka nisur një vizitë zyrtare dyditore në Kosovë. Lajmi është konfirmuar nga misioni i UNMIK-ut.
Agjenda e zyrtarit të lartë përfshin takime me përfaqësues të institucioneve të larta shtetërore, partnerë ndërkombëtarë, shoqërinë civile dhe kolegë të tij nga UNMIK-u. Përveç takimeve institucionale, Lacroix pritet të vizitojë projekte të ndryshme të mbështetura nga OKB-ja, të cilat synojnë zhvillimin dhe stabilitetin.
Sipas njoftimit zyrtar, diskutimet do të përqendrohen në rolin e Kombeve të Bashkuara në ruajtjen e paqes, forcimin e bashkëpunimit shumëpalësh dhe mbështetjen për stabilitetin në rajon. Pas përmbylljes së vizitës në Kosovë, Jean-Pierre Lacroix do të vazhdojë turneun rajonal në Serbi dhe Bosnjë e Hercegovinë.