Një 13-vjeçar në Shkodër akuzohet nga banorët e zonës për ushtrimin e dhunës së vazhdueshme ndaj bashkëmoshatarëve dhe për grabitje ndaj të moshuarve, duke u marrë atyre para dhe sende personale. Denoncimi ka ardhur në redaksinë e emisionit investigativ Fiks Fare.
Nëna e një nxënësi të klasës së tetë tregon se i mituri, i cili ka qenë më parë pjesë e të njëjtës shkollë me djalin e saj, ka krijuar situata frike. Edhe pse është larguar nga shkolla, ai vazhdon të qëndrojë pranë ambienteve të saj. Djali i saj nuk guxon të dalë i vetëm nga shtëpia, babai ka lënë punën për ta shoqëruar çdo ditë në shkollë, ka ndërprerë aktivitetet sportive dhe shmang lëvizjet pa prindërit. 13-vjeçari e detyron të japë biçikletën, e kërcënon dhe e ka dhunuar fizikisht në disa raste.
Pamjet e siguruara nga Fiks Fare tregojnë i miturin duke dhunuar një të moshuar: i rrëzon biçikletën, i hedh sendet në tokë dhe i merr portofolin, duke u larguar pa pengesa.
Nëna e 13-vjeçarit e justifikon sjelljen me hiperaktivitet. Ajo është në dijeni të shoqërimeve të tij në komisariat dhe thotë se është kërkuar ndihma e psikologëve në shkollë, por ndërhyrja ka qenë e kufizuar.
Drejtuesit e shkollës aktuale ku ndjek mësimin i mituri pranojnë probleme me mungesat e tij, por theksojnë se brenda institucionit sillet në mënyrë të rregullt.
Burime nga policia bëjnë të ditur se 13-vjeçari është referuar 4 herë në prokurori brenda një periudhe.