Në një kopsht jo publik në Tiranë është konfirmuar shpërthimi i fruthit, ku 15 fëmijë kryesisht të pavaksinuar janë infektuar dhe kanë transmetuar sëmundjen mes tyre.
Prindërit e fëmijëve në këtë kopsht janë njoftuar nga edukatoret për të mbajtur fëmijët në shtëpi, për të parandaluar përhapjen. Vatër e shpërthimit tani është izoluar.
Instituti i Shëndetit Publik nuk ka bërë ende deklaratë zyrtare. Autoritetet shëndetësore njoftuan se mbulesa vaksinale ndaj fruthit me dozën e parë ka rënë në afro 83%, ndërsa Organizata Botërore e Shëndetësisë (OBSH) rekomandon të paktën 95%. Vaksinimi kryhet me vaksinën MMR në moshën njëvjeçare.
Sipas ligjit, fëmijët pa kalendarin e vaksinimit të detyrueshëm nuk pranohen në institucionet arsimore. Megjithatë, disa kopshte dhe shkolla jo publike nuk e respektojnë këtë detyrim, duke u bërë vatër transmetimi sëmundjesh infektive si fruthi.
Rënia e mbulesës vaksinale lidhet me skepticizmin e prindërve dhe ndikimin e grupeve kundër vaksinimit. Raste sporadike të fruthit janë raportuar në disa vende evropiane.