Në vitin 2025, në Kosovë u regjistruan 18 vrasje, sipas të dhënave zyrtare. Ekspertë të sigurisë kanë ngritur shqetësimin për motivet e këtyre rasteve, të cilat ndërlidhen me krimin e organizuar dhe aktivitetet e kundërligjshme.
Gjatë gushtit 2025, katër persona u vranë brenda një dite, përfshirë vrasjen trefishtë në Gjilan. Ngjarja ndodhi në një kafene pranë Komunës së Gjilanit, ku nga të shtënat me armë u vranë babë e bir, si dhe një person tjetër. I dyshuari kryesor është Mefail Shkodra, person me të kaluar penale, përfshirë fajde. Po atëherë u regjistrua vrasja me thikë në fshatin Zhur të Prizrenit.
Gjatë të njëjtit muaj u shënua vrasje tjetër në Hajvali të Prishtinës, ndërsa në fshatin Baicë të Lipjanit një person u gjet i vdekur dhe i varrosur në një arë.
Një rast tjetër është vrasja e rreshterit të Policisë së Kosovës, Muhamed Lika, në hyrje të banesës së tij në Kaçanik. Pak ditë më parë u ngrit aktakuzë kundër gjashtë të pandehurve.
Drejtori i përgjithshëm i Policisë së Kosovës, Gazmend Hoxha, në një intervistë për KosovaPress, deklaroi se Mefail Shkodra dhe djemtë e tij kishin të kaluar të dyshimtë kriminale. Ai theksoi se personat e dyshuar për vrasjen në Gjilan ishin arrestuar më parë për fajde, por u liruan për shkak të procedurave të limituara ligjore. "Ne i kemi pasur në procedim, i kemi arrestuar për raste fajdeje dhe pastaj janë liruar", u shpreh Hoxha, duke përmendur se i dyshuari kryesor ishte arrestuar gjashtë muaj më parë nga Policia e Kosovës.