Në Kosovë, institucionet e rendit dhe ekspertët kanë shprehur shqetësim për shifrat e vrasjeve të raportuara gjatë këtij viti. Sipas të dhënave nga Policia e Kosovës, gjatë periudhës janar-qershor 2026 janë regjistruar 13 vrasje, ndërsa për të gjithë vitin 2025 ishin raportuar 19 vrasje në total.
Vetëm gjatë javës së fundit, në vend kanë ndodhur tri ngjarje të rënda: një vrasje me thikë në mesnatën e së enjtes, ku humbi jetën një 15-vjeçar, si dhe dy vrasje të grave në Malishevë dhe Prizren. Në rastin e parë, i dyshuari është një 17-vjeçar, ndërsa për vrasjet e grave, të dyshuar janë bashkëshortët e tyre.
Sociologu Genc Xërxa vlerëson se ky fenomen lidhet me natyrën patriarkale të shoqërisë, ku gruaja shpesh trajtohet si pronë. Ai shton se një faktor tjetër është normalizimi institucional i dhunës, e cila, kur nuk adresohet në fazat fillestare, mund të përshkallëzohet në krime të rënda.
Njohësi i çështjeve të sigurisë, Fatmir Çollaku, thekson se pasiguria është në rritje dhe kërkon masa më të rrepta parandaluese. Sipas tij, një shqetësim i veçantë mbetet posedimi i armëve pa leje nga qytetarët. Ndonëse numri i këtyre armëve është më i ulët krahasuar me dy dekada më parë, Çollaku kërkon nga institucionet përkatëse angazhim më të madh për grumbullimin dhe konfiskimin e tyre, si një mekanizëm thelbësor për parandalimin e vrasjeve në të ardhmen.