209 rekrutë të rinj kanë nisur stërvitjen ushtarake bazë në Komandën e Doktrinës dhe Stërvitjes të Forcës së Sigurisë së Kosovës (FSK), njoftoi ministri i Mbrojtjes, Ejup Maqedonci.
Sipas Maqedoncit, gjatë stërvitjes rekrutët do të zhvillojnë njohuritë dhe shkathtësitë e nevojshme ushtarake për t’i vënë në shërbim të mbrojtjes së vendit. Nisja e saj vjen pak ditë pasi 515 të rinj dhe të reja dhanë betimin solemn dhe iu bashkuan radhëve të FSK-së.
Maqedonci shkroi në Facebook se rekrutimi, shkollimi dhe stërvitjet ushtarake krijojnë mundësi për gjeneratat e reja që të zhvillohen profesionalisht dhe të kontribuojnë në sigurinë dhe mbrojtjen e Kosovës. Ai u uroi suksese rekrutëve në rrugëtimin e tyre ushtarak.
Ministri tha se investimet në përgatitjen e ushtarëve po vazhdojnë krahas investimeve në armatim dhe pajisje moderne. Sipas tij, personeli i mirëtrajnuar dhe profesional është themeli i një force të aftë dhe të gatshme për t’u përballur me sfidat e së ardhmes.