Në Tiranë u zhvillua ceremonia e diplomimit për 67 oficerë të rinj në Akademinë e Forcave të Armatosura të Republikës së Shqipërisë (AFASH). Ky grup përfshinte 10 oficerë nga Kosova, të cilët do t'i bashkohen radhëve të Forcës së Sigurisë së Kosovës (FSK).
Ngjarja u vlerësua si dëshmi e bashkëpunimit ndërmjet dy vendeve në fushën e mbrojtjes dhe ndërtimit të kapaciteteve ushtarake konform standardeve të NATO-s. Në ceremoni ishin të pranishëm kryeministri i Shqipërisë, Edi Rama, si dhe ministri i Mbrojtjes së Shqipërisë, Ermal Nufi, dhe ministri i Mbrojtjes së Kosovës, Ejup Maqedonci.
Ministri Ejup Maqedonci theksoi se numri i ushtarakëve kosovarë që ndjekin studime dhe trajnime në institucionet ushtarake të Shqipërisë ka ardhur duke u rritur. Sipas ministrit, vetëm gjatë vitit 2026, qindra pjesëtarë të ushtrisë së Kosovës janë duke ndjekur ose janë të planifikuar të ndjekin programe të ndryshme të edukimit dhe trajnimit ushtarak, gjë që pasqyron angazhimin e përbashkët për zhvillimin e kapaciteteve mbrojtëse.
Përditësime
Ministri i Mbrojtjes, Ermal Nufi, vlerësoi rolin e Akademisë së Forcave të Armatosura në formimin e oficerëve me integritet, gjatë ceremonisë së diplomimit të 67 oficerëve nga 'Kursi i Përgatitjes së Oficerit'. Ministria e Mbrojtjes e cilësoi këtë kontingjent si një kontribut të rëndësishëm për t'iu përgjigjur dinamikave të ndryshueshme të sigurisë.