Ministri në detyrë i Mbrojtjes, Ejup Maqedonci, takoi pesë kadetë nga Kosova të cilët përfunduan me sukses studimet në Akademinë Ushtarake të Forcave të Armatosura të Republikës së Turqisë. Takimi u zhvillua para fillimit të ceremonisë së diplomimit të oficerëve të rinj.
Nëntogerët që përfunduan shkollimin janë Ramadan Rexha, Gjergj Dreni, Altin Salihaj, Elmë Ramadani dhe Admirim Ismajli. Formimi i tyre pesëvjeçar përfshiu një vit kurs përgatitor për gjuhën turke dhe katër vite studime ushtarake në këtë akademi.
Gjatë takimit, ministri Maqedonci vlerësoi lart rëndësinë e edukimit dhe zhvillimit profesional si një ndër prioritetet kryesore të Ministrisë së Mbrojtjes dhe Forcës së Sigurisë së Kosovës. Ai theksoi se investimi në kuadro të mirëfillta ushtarake është thelbësor për të ardhmen e institucionit dhe për krijimin e një force moderne, profesionale dhe të ndërveprueshme me ushtritë e vendeve partnere.
Ministri shprehu mirënjohje ndaj Republikës së Turqisë për mbështetjen e vazhdueshme në arsimimin dhe zhvillimin profesional të pjesëtarëve të FSK-së. Sipas Maqedoncit, shkollimi i oficerëve në akademitë prestigjioze të vendeve partnere ndihmon gjithashtu në forcimin e lidhjeve dhe bashkëpunimit mes forcave të armatosura.