Një ngjarje tragjike ka ndodhur në qytetin Cadimare të Italisë, ku një i ri shqiptar humbi jetën teksa notonte në ujërat e Gjirit të Poetëve. Viktima është identifikuar si Ambler Xhoecuka, i cili do të mbushnte 23 vjet pas pak javësh.
Sipas raportimeve të mediave italiane, i riu kishte vendosur të notonte për herë të parë në këtë sezon turistik. Ai la rrobat pranë bregut dhe hyri në det, por vetëm pak minuta më vonë pësoi një kolaps brenda në ujë.
Një grua që po kalonte pranë zonës vuri re trupin e pajetë duke lundruar rreth 50 metra larg bregut dhe ngriti menjëherë alarmin. Dy të rinj u hodhën në ujë dhe arritën ta nxirrnin të riun në breg.
Shërbimi Shëndetësor Emergjent Italian ndërhyri menjëherë dhe bëri përpjekje për reanimim për gati një orë, por pa sukses. Autoritetet italiane bënë identifikimin e viktimës përmes dokumenteve dhe sendeve personale që ai kishte lënë në breg.
Dyshohet se i riu është ndier keq papritur për shkak të një mbingarkese fizike gjatë notit në ujërat ende të ftohta të gjirit.