Një 27-vjeçare me iniciale M.S. ka humbur jetën në Shkodër pak orë pasi lindi binjakë. Gjendja e saj shëndetësore u përkeqësua menjëherë pas lindjes për shkak të komplikacioneve dhe hemorragjisë së rëndë, duke kërkuar gjak të grupit 0 negativ.
Familjarët dhe institucionet shëndetësore bënë apel urgjent për dhurim gjaku, i cili u përhap shpejt në rrjetet sociale dhe media. Dhjetëra qytetarë iu përgjigjën thirrjes dhe dhuruan gjak.
Sipas korrespondentit Klodian Zhivani të Top Channel, pavarësisht solidaritetit të qytetarëve dhe përpjekjeve të stafit mjekësor, gruaja nuk arriti të mbijetojë gjendjen kritike.
Ngjarja ka prekur opinionin publik. Qytetarë të shumtë kanë shprehur ngushëllime dhe mbështetje për familjen, e cila po përballet me humbjen në një moment që duhej të ishte gëzim për ardhjen e dy foshnjave.