Sot, më 9 maj 2026, shënohen 28 vjet nga vrasja e Ilir Konushevcit, njërit ndër themeluesit e Ushtrisë Çlirimtare të Kosovës në Llap dhe mbështetës i sektorit të logjistikës për UÇK-në. Homazhe mbahen në fshatin Velani.
Ilir Konushevci lindi më 20 qershor 1969 në fshatin Llugë të komunës së Podujevës. Fëmijërinë e kaloi në fshatin e lindjes, shkollën fillore e kreu në Lluzhan, atë të mesmen në Podujevë, ndërsa u regjistrua në Shkollën e Lartë në Ferizaj, të cilën nuk e përfundoi për shkak të aktiviteteve të tij.
Më 13 maj 1992, ai, së bashku me Rexhep Uken, Selim Hazirin, Naim Hysen-in, Lulëzim Podvoricën, Naim Hazirin, Bejtush Llugaliun dhe Shaip Hazirin, themeluan grupin ilegal apolitik Shqiponjat. Ky grup synonte t'i kundërvënia atyre që rrezikonin pasurinë dhe gjërat e njerëzve në Kosovë, duke mos lënë anash strategjinë luftarake. Betimi i grupit përmbante fjalët: "Betohem para flamurit dhe para shokëve se detyrat, të cilat i parashtron grupi, do t'i kryej me besnikëri dhe nëse është nevoja edhe jetën do ta jap për realizimin e idealit tonë".
Në vitin 1993, grupi Shqiponjat hyri në kontakt me LKÇK-në. Pavarësisht dallimeve të vogla në organizim, palët gjetën mënyrë për bashkëpunim, sepse të dyja besonin se çlirimi i Kosovës mund të realizohej përmes luftës së armatosur. Shqiponjat ndihmoi në shpërndarjen e organit Çlirimi të LKÇK-së. Bashkëpunimi zgjati deri në fund të 1993-s dhe fillim të 1994-s.
Në qershor të 1996-s, njësiti ra në kontakt me komandantin Zahir Pajazitin përmes Rrustem Mustafës (Remit) dhe qëndroi krah tij. Pas vrasjes së Zahir Pajazitit, Hakifit dhe Edmondit më 31 janar 1997 në fshatin Pestovë afër Vushtrrisë, me sugjerim të shokëve Selim Haziri, Naim Hyseni dhe Naim Haziri, kaluan në ilegalitet në një banesë në Prishtinë për disa ditë dhe më pas vendosën të kalojnë në Shqipëri.