Sot, më 20 qershor, është përkujtuar përvjetori i lindjes së heroit të kombit, Ilir Konushevci, një nga figurat qendrore të Ushtrisë Çlirimtare të Kosovës. Me këtë rast, ministri në detyrë i Mbrojtjes, Ejup Maqedonci, zhvilloi homazhe dhe vendosi lule pranë bustit të dëshmorit në Kazermën "Adem Jashari" në Prishtinë.
Ilir Konushevci, i lindur më 20 qershor 1969, njihet si njëri ndër themeluesit e UÇK-së në zonën e Llapit dhe kontribuuesi kryesor në organizimin e sektorit të logjistikës për forcat çlirimtare. Ai ra dëshmor më 9 maj 1998.
Në mesazhin e tij përkujtimor, ministri Maqedonci theksoi se vepra dhe sakrifica e Konushevcit mbeten frymëzim për brezat. "Heronjtë nuk vdesin kurrë. Ata kanë vetëm ditëlindje. Lavdi e përjetshme Heroit të Kombit, Ilir Konushevci!", shkroi ndër të tjera ministri Maqedonci në rrjetet sociale.