Enver Hoxhaj, anëtar i Kryesisë së Partisë Demokratike të Kosovës (PDK), ka bërë homazhe pranë varrit të Heroit të Kombit Ilir Konushevci dhe Dr. Hazir Malaj. Ai u bashkua me familjarët e tyre për të nderuar sakrificën dhe kontributin në luftën çlirimtare të Kosovës.
Homazhet u zhvilluan në përvjetorin e rënies së tyre, 28 vite më parë. Në një postim në Facebook, Hoxhaj shkroi: «Pranë varrit të Heroit të Kombit Ilir Konushevci dhe Dr. Hazir Malaj, bashkë me familjarët e tyre, kujtuam me dhimbje e krenari sakrificën e njerëzve që ia hapën rrugën lirisë së Kosovës. 28 vite më pas, emri dhe vepra e Ilirit dhe Hazirit mbeten amanet për të mos harruar kurrë çmimin e lirisë. Lavdi të përjetshme!».
Ilir Konushevci dhe Dr. Hazir Malaj konsiderohen figura simbol të rezistencës dhe luftës çlirimtare të Kosovës.