Një ortek i fuqishëm është shkëputur në majën e Briasit, në lartësinë 2.570 metra mbi nivelin e detit, në zonën alpine të Luginës së Valbonës, në Alpet Shqiptare. Ngjarja ndodhi sot, ndërsa një grup prej 40 alpinistësh nga Kosova po eksploronin zonën prej tre ditësh.
Alpinistët filmuan momentin kur orteku zbret me shpejtësi drejt luginës, duke krijuar një re të dendur bore. Pamjet janë regjistruar nga Kristian Gashi, anëtar i klubit alpin Prishtina. Rreziku është rritur për shkak të reshjeve të fundit të dëborës dhe erërave të forta në zonën verilindore.
Në zonën e ngjarjes nuk ka banesa dhe nuk raportohen persona të lënduar apo dëme materiale. Kushtet në terren mbeten tërheqëse për ecje, por të rrezikshme për shkak të paqëndrueshmërisë së shtresave të dëborës.
Kristian Gashi apelon për kujdes: "Duhet të keni kujdes këto ditë për shkak të orteqeve në të gjithë Kosovën dhe Shqipërinë, sidomos në anën veriore. Nuk duhet të bëni ngjitje pa guida, pa udhëheqës dhe t’i limitoni sa më shumë ngjitjet nëpër lloje të tilla të bjeshkëve".
Alpinistët e tjerë shprehen të kënaqur me ecjen. Visar Ponosheci tha se kishin bërë një ecje të fortë dhe vazhdojnë të ecin. Fitim Morina vlerësoi kohën e mirë dhe kolegët. Ilirijada Fejza përmendi një ecje prej 9 kilometrash në Valbonë.
Kërkohet vëmendje për sigurinë e banorëve dhe turistëve në kushtet aktuale.