Një ortek i fuqishëm u regjistrua pasditen e djeshme në zonën e Valbonës, në Tropojë, në Alpet shqiptare. Ngjarja solli pamje të qarta të një mase të madhe dëbore që u shkëput nga mali dhe zbriti me shpejtësi drejt luginës, duke krijuar një re të dendur të bardhë që mbuloi zonën.
Pamjet u filmuan nga Klubi Alpin Prishtina dhe u publikuan në rrjetin social Facebook nga kryetari i Bashkisë Tropojë, Rexhë Byberi. Ai shoqëroi videon me një apel për sigurinë e vizitorëve dhe banorëve.
Në apel, Rexhë Byberi shkruan: “Reshjet e fundit të borës kanë rritur rrezikun e orteqeve. Kërkohet kujdes maksimal nga të gjithë vizitorët. Informohuni nga guida lokale. Shmangni zonat e rrezikuara. Respektoni udhëzimet e banorëve dhe autoriteteve. Pronarët e bujtinave të informojnë vizitorët për rreziqet aktuale. Siguria mbi gjithçka”.
Nga pamjet shihet se orteku u përhap në një sipërfaqe të gjerë përgjatë shpatit të malit, duke treguar intensitet të lartë të rrëshqitjes. Fatmirësisht, në zonën e ngjarjes nuk ka banesa dhe nuk raportohen persona të lënduar apo dëme materiale.
Autoritetet lokale theksojnë nevojën për vigjilencë, veçanërisht në shtigjet malore dhe zonat e ekspozuara, në një kohë kur fluksi i vizitorëve në Alpet shqiptare mbetet i lartë.