Në datën 5 shkurt 2026, ortekë dëbore kanë rënë në zonën pranë tuneleve panoramike të aksit rrugor Qafë Thore-Theth, duke bllokuar plotësisht qarkullimin e automjeteve.
Autoriteti Rrugor Shqiptar (ARRSH) bën të ditur se për arsye sigurie, rruga do të qëndrojë e mbyllur për të gjitha mjetet, përfshirë edhe ato borëpastruese, pasi zona paraqet rrezik të lartë për kalim.
Në njoftimin zyrtar thuhet: «Si pasojë e rënies së ortekëve në zonën pranë tuneleve panoramike të aksit Qafë Thore-Theth, rruga është bllokuar plotësisht. Për arsye sigurie, qarkullimi do të qëndrojë i mbyllur për të gjitha automjetet, përfshirë edhe mjetet borëpastruese, pasi zona paraqet rrezik të lartë për kalim. U bëjmë thirrje drejtuesve të mjeteve të respektojnë sinjalistikën, të shmangin këtë aks dhe të ndjekin njoftimet zyrtare për përditësime të mëtejshme».
Reshjet e dëborës të shoqëruara me erë kanë kontribuar në këtë situatë, sipas raportimeve nga terreni.