Aksi rrugor Qafë Thore-Theth është i bllokuar për shkak të rrezikut nga ortekët dhe kushteve të vështira atmosferike.
Sipas njoftimit të Autoriteti Rrugor Shqiptar (ARRSH), firma e kontraktuar për mirëmbajtjen e segmentit ka kërkuar ndërhyrjen e Policisë, pasi disa drejtues mjetesh kanë tentuar të kalojnë, pavarësisht rrezikshmërisë së lartë.
ARRSH bën me dije se rreth orës 08:30 një patrullë policie ka mbërritur në zonë dhe po monitoron situatën, duke mos lejuar qarkullimin e automjeteve në drejtim të Thethit.
Autoritetet u bëjnë thirrje qytetarëve të shmangin lëvizjet në këtë aks deri në një njoftim të dytë, për shkak të rrezikut serioz që paraqesin ortekët në zonat malore.