Rruga Qafë Thore–Theth është bllokuar plotësisht më 14 janar 2026, si pasojë e rënies së ortekëve të borës në zonën pranë tuneleve panoramike, rreth km 5.5.
Autoriteti Rrugor Shqiptar (ARRSH) ka njoftuar se situata paraqet rrezik të lartë për kalim, duke urdhëruar mbylljen totale të qarkullimit për të gjitha automjetet, përfshirë edhe mjetet borëpastruese. Në afërsi të zonës së rrezikuar po punohet për largimin e ortekëve të vegjël dhe për zgjerimin e pjesës kaluese si punë përgatitore.
Kryetari i Bashkisë Shkodër, Benet Beci, ka konfirmuar bllokimin në rrjetet sociale, duke shpjeguar se rënia e ortekëve është riaktivizuar për shkak të rritjes së temperaturave dhe ndikimit të rrezeve të diellit në shpatin malor. Ndërhyrja për pastrim paraqitet e rrezikshme deri në stabilizimin e borës në shpatin malor, prandaj është urdhëruar ndërprerja e çdo përpjekjeje për largimin e borës nga ortekët.
Autoritetet këshillojnë drejtuesit e mjeteve të shmangin këtë aks, të respektojnë sinjalistikën dhe të ndjekin njoftimet zyrtare për përditësime. Strukturat përgjegjëse do të monitorojnë vazhdueshëm situatën dhe do të njoftojnë për zhvillimet e mëtejshme.
Përditësime
Borëpastruesit dhe punonjësit mbërritën në terren dhe nisën punën për hapjen e rrugës Qafë Thore–Theth, e bllokuar në një segment prej 5,5 kilometrash.