Mëngjesin e sotëm, në zonën e tuneleve të Qafë Thore, janë aktivizuar sërish ortekë dëbore, duke bllokuar plotësisht segmentin rrugor.
Reshjet intensive të orëve të para të mëngjesit, të shoqëruara me rritjen e temperaturave në rreth 0°C, kanë krijuar kushte të favorshme për shkëputjen e masave të dëborës nga shpatet malore mbi rrugë.
Si pasojë, zona e tuneleve është bërë e pakalueshme për automjetet, ndërsa rreziku për rënie të tjera ortekësh mbetet i lartë. Sasia e konsiderueshme e borës së akumuluar në terren, e kombinuar me temperaturat në rritje, rrit mundësinë e aktivizimeve të mëtejshme.
Strukturat e mirëmbajtjes rrugore dhe emergjencave civile janë në monitorim të vazhdueshëm të situatës. Ndërhyrja për pastrimin e segmentit dhe rikthimin e qarkullimit pritet të nisë sapo kushtet të konsiderohen të sigurta për ekipet në terren.
Autoritetet u bëjnë thirrje drejtuesve të automjeteve të shmangin lëvizjen drejt zonës deri në njoftim të dytë dhe të ndjekin informacionet zyrtare për përditësime.