Në zonën e Qafë Thore vijojnë reshjet e dëborës me intensitet të lartë, duke krijuar vështirësi në qarkullim. Autoriteti Rrugor Shqiptar (ARRSH) njofton se aktualisht po punohet me dy borëpastruese njëkohësisht për mbajtjen e rrugës të hapur dhe të kalueshme.
Sipas njoftimit të ARRSH-së, momentalisht qarkullimi i mjeteve vijon pa probleme, por situata mbetet dinamike. Parashikimet e motit tregojnë se reshjet do të vazhdojnë me intensitet gjatë gjithë natës, çka mund të sjellë vështirësi si për qarkullimin e mjeteve, ashtu edhe për punën e borëpastrueseve.
Grupi i punës dhe mjetet janë në terren dhe po monitorojnë situatën në vijimësi. ARRSH u bën thirrje drejtuesve të mjeteve të tregojnë kujdes maksimal, të pajisen me zinxhirë gjatë lëvizjes në këtë aks dhe të ndjekin udhëzimet e dhëna në terren.