Reshjet me intensitet dhe rrebeshet e orëve të fundit kanë prekur zonat veriore të vendit, duke sjellë rënie gurësh dhe materialesh në disa akse rrugore. Autoriteti Rrugor Shqiptar (ARRSH) njoftoi se situata po monitorohet në vazhdimësi për të garantuar sigurinë e përdoruesve të rrugës.
Aksi Qafë Thorë–Theth pësoi një bllokim të përkohshëm për shkak të materialeve të rëna në trup të rrugës. Megjithatë, pas ndërhyrjes së menjëhershme të kontraktorit të mirëmbajtjes, i cili angazhoi mjete dhe punonjës shtesë, segmenti u pastrua dhe qarkullimi u rikthye në normalitet për të gjitha mjetet.
Sipas të dhënave zyrtare të ARRSH-së, rënie gurësh dhe inertesh janë shënuar edhe në disa segmente të tjera, të cilat nuk kanë sjellë probleme për lëvizjen e automjeteve. Këto akse përfshijnë:
• Bajram Curri–Valbonë
• Ura Bujan–Qafë Morinë
• Qafë Mejdan–Tropojë–Buçaj
• Bajram Curri–Fierzë
• Dushaj–Lekbibaj
Strukturat e mirëmbajtjes vijojnë të jenë në terren për të monitoruar situatën dhe për të siguruar pastrimin e vazhdueshëm të trupit të rrugës, duke garantuar kështu qarkullimin normal në të gjitha zonat e prekura nga reshjet.
Përditësime
Autoriteti Rrugor Shqiptar (ARRSH) ka bërë thirrje për kujdes të shtuar në zonat malore, për shkak të reshjeve të dendura që po shkaktojnë rënie gurësh dhe inertesh. Drejtuesit e mjeteve këshillohen të shmangin udhëtimet e panevojshme në segmentet e rrezikuara deri në përmirësimin e kushteve atmosferike.