Reshjet e dëborës kanë nisur gjatë orëve të para të mëngjesit të 17 shkurtit 2026 në zonat veriore të Shqipërisë, në lartësi mbi 800 metra, si dhe në juglindje të vendit. Kjo vjen pas reshjeve shiu me intensitet mesatar gjatë natës.
Autoriteti Rrugor Shqiptar (ARRSH) ka renditur akset rrugore me prani dëbore, ku qarkullimi vijon normalisht në shumicën e tyre. Vetëm aksi i Qafë Thorës mbetet i bllokuar për shkak të rënies së vazhdueshme të ortekëve.
Akset me reshje dëbore përfshijnë:
• Bajram Curri–Valbonë
• Ura e Bujanit–Qafë Morinë
• Fierzë–Bajram Curri
• Kukës–Krumë
• Kukës–Shishtavec
• Hani i Hotit–Vermosh
• Bogë–Theth
• Qukës–Qafë Plloçë
• Korçë–Voskopojë
• Korçë–Ersekë
• Ersekë–Tre Urat
Kontraktorët janë në terren me mjete dhe punëtorë për pastrimin e rrugëve dhe shpërndarjen e kripës, me qëllim shmangien e ngricave.
ARRSH u kërkon drejtuesve të mjeteve të ushtrojnë kujdes të shtuar, të pajisen me goma dimërore dhe zinxhir kur udhëtojnë në akse me dëborë.