Një 58-vjeçar është arrestuar në Torino të Italisë, pasi dyshohet se i ka marrë jetën nënës së tij 86-vjeçare dhe ka varrosur trupin në një pyll pranë zonës Palazzina di Caccia.
E moshuara ishte shpallur e zhdukur rreth një muaj më parë. Alarmin e ngriti një e njohur e saj, e cila kishte humbur kontaktet me të dhe njoftoi autoritetet.
Policia italiane e kontaktoi djalin e të moshuarës dhe e mori në pyetje. Fillimisht, ai pretendoi se nëna e tij kishte ndërruar jetë për shkaqe natyrale dhe se ai e kishte varrosur trupin. Më pas, ndryshoi dëshminë dhe pranoi se e kishte vrarë, duke deklaruar se kishte frikë të humbiste pensionin e saj, të cilin e shihte si të vetmin burim të ardhurash.
Trupi u gjet në vendin e treguar nga i dyshuari. Hetimet vijojnë për të zbardhur motivet dhe rrethanat e plota të ngjarjes, ndërsa autopsia pritet të përcaktojë shkakun e saktë të vdekjes.
Përditësime
Enrica Bardotti është emri i plotë i viktimës, nënës së 58-vjeçarit të arrestuar në Torino.
58-vjeçari pranoi se varrosi trupin e nënës pranë shtëpizës së gjuetisë në Stupinigi. „Unë varrosa trupin e nënës sime, mund ta gjeni pranë shtëpizës së gjuetisë në Stupinigi. Kisha frikë se mos humbisja pensionin,“ deklaroi ai. Autoritetet dyshojnë se vrasja ndodhi disa muaj më parë, ndërsa fqinjët kishin raportuar zhdukjen.