Një 59-vjeçar humbi jetën mbrëmjen e së martës në fshatin Bajincë të komunës së Kaçanikut, pasi ra në një bunar në oborrin e shkollës lokale.
Zëdhënësi i Policisë së Kosovës për rajonin e Ferizajt, Kanun Veseli, konfirmoi ngjarjen. Ai bëri të ditur se rasti u raportua në orët e vona të mbrëmjes dhe menjëherë në vendndodhje mbërritën njësitë policore, ekipet e zjarrfikësve dhe shërbimet emergjente.
Rreth orës 22:30, pas angazhimit të zjarrfikësve dhe vullnetarëve, trupi u nxorr nga bunari. Mjeku kujdestar konstatuan mungesën e shenjave të jetës.
“Për të gjitha veprimet policore është njoftuar prokurori i shtetit dhe me vendim të tij, trupi i pajetë i viktimës është dërguar në Institutin e Mjekësisë Ligjore për autopsi. Rasti është cilësuar vdekje e dyshimtë”, deklaroi Veseli.
Autoritetet po vazhdojnë hetimet për të sqaruar rrethanat e ngjarjes. Klan Kosova raporton se i ndjeri quhet Sylejman Fazliu.
Përditësime
Varrimi i viktimës mbahet sot në orën 16:00 në varrezat e Bajnicës.
I ndjeri shërbente si punëtor teknik në shkollën e Kaçanikut.