Veprimet e bankingut në distancë u rritën me ritme dyshifrore gjatë tremujorit të parë të 2026-s. Sipas të dhënave të Bankës së Shqipërisë, numri i transaksioneve në distancë arriti në 3.06 milionë, duke shënuar rritje prej 26% krahasuar me të njëjtën periudhë të vitit 2025.
Vlera totale e transfertave të kryera përmes internet banking arriti në 528.4 miliardë lekë, me rritje prej 31% ndaj periudhës së njëjtë të vitit të kaluar. Transaksionet nga kanalet dixhitale përbënin 67% të numrit total të transfertave bankare, në rritje nga pesha prej 64% që kishin vitin e kaluar.
Të gjitha bankat tregtare në Shqipëri ofrojnë shërbime home banking, duke u mundësuar klientëve kryerjen e pagesave pa qenë nevoja të paraqiten fizikisht në degë. Përdorimi i këtyre kanaleve është nxitur nga komisionet më të ulëta që parashikon rregullorja e re e Bankës së Shqipërisë për sistemin e klerimit të pagesave me vlerë të vogël, e miratuar në shtator të vitit të kaluar.