Bashkimi Evropian kremton 9 majin si Ditën e Europës, në nderim të Robert Schuman, ish-ministrit francez të Jashtëm, i cili në këtë datë të vitit 1950 formuloi idenë e bashkëpunimit evropian. Që nga viti 1985, kryetarët e shteteve dhe qeverive e kanë shpallur këtë ditë festë zyrtare.
Më 23 korrik 1952 hyri në fuqi Montanunion-i, ose Komuniteti Evropian për Qymyrin dhe Çelikun, me Franca, Italinë, Gjermaninë Perëndimore, Belgjikën, Hollandën dhe Luksemburgun. Ky komunitet, i propozuar nga Schuman, parashikoi administrimin e përbashkët të prodhimit të qymyrit dhe çelikut përmes një institucioni mbinacional me kompetenca vendimmarrëse. Ai shërbeu si bërthama e Komunitetit Ekonomik Evropian, të krijuar në 1957 me Traktatet e Romës, dhe më pas çoi në formimin e Bashkimit Evropian në fillim të viteve 1990.
Konteksti historik
Propozimi erdhi pesë vjet pas mbarimit të Luftës së Dytë Botërore, kur Republika Federale Gjermane nuk kishte festuar ende njëvjetorin e saj. Marrëdhëniet gjermano-franceze ishin të mbushura me mosbesim. Schuman dhe kancelari gjerman Konrad Adenauer hodhën themelet e pajtimit evropian.
Citati i Schuman-it
"Evropa duhet të pushojë së qeni një vend betejash, ku palët armike mbyten në gjak. Nga ky vetëdijësim i paguar kaq shtrenjtë, ne duam të ecim në rrugë të reja, që na çojnë në një Evropë të bashkuar dhe në paqe", tha Schuman.
Biografia e Robert Schuman
Robert Schuman lindi në Perandorinë Gjermane me gjuhë amtare atë të Luksemburgut. Ai jetoi, studioi dhe punoi në Luksemburg, Bon, Mynih, Berlin, Strasburg dhe Metz. Pas Luftës së Parë Botërore, kur Alsace-Lorena kaloi nga Gjermania te Franca në 1919, ai mori nënshtetësinë franceze dhe filloi karrierën politike. Edhe pse fliste frëngjisht me theks gjatë gjithë jetës, pak pas Luftës së Dytë Botërore u bë kryeministër i Francës. Ai përjetoi të dyja luftërat botërore dhe kishte lidhje me Gjermaninë, Luksemburgun dhe Francën.