Kancelari gjerman Friedrich Merz ka deklaruar në samitin e vendeve të Ballkanit Perëndimor me Bashkimin Evropian, të mbajtur në Tivat, se procesi i integrimit është penguar nga vonesa të gjata. Gjatë fjalës së tij, ai nënvizoi se përgjegjësia për moszgjerimin në dekadën e fundit nuk qëndron vetëm te vendet kandidate, por edhe te vetë Bashkimi Evropian.
"Nëse nuk kemi pranuar asnjë anëtar të ri për 13 vjet, kjo tregon se ka mangësi edhe nga ana e Bashkimit Evropian", theksoi Merz, duke shtuar se perspektiva evropiane për këtë rajon mbetet e palëkundur. Për të zhbllokuar këtë proces, kancelari gjerman konfirmoi se në tryezën e diskutimeve është vendosur një nismë e përbashkët me presidentin francez Emmanuel Macron.
Sipas Merz, kjo iniciativë synon të ofrojë ide të reja për të ndihmuar vendet e rajonit në përmbushjen e reformave të nevojshme. Ai shprehu optimizëm pas takimeve të zhvilluara me përfaqësues të vendeve të Ballkanit Perëndimor, duke vlerësuar gatishmërinë për të arritur marrëveshje konkrete. Kancelari veçoi Malin e Zi si një shembull pozitiv, ku sipas tij, mund të shënohen rezultate të shpejta në rrugën drejt integrimit, ndërsa theksoi se puna mbetet e vështirë, por e arritshme.