Kryeministri Edi Rama dhe Presidenti i Serbisë, Aleksandar Vuçiç, kanë publikuar një artikull të përbashkët në të përditshmen gjermane Frankfurter Allgemeine Zeitung më 28 shkurt 2026. Në të, ata vlerësojnë zgjerimin e Bashkimit Europian si proces kyç që ka ndryshuar BE-në që nga rënia e Murit të Berlinit, duke sjellë demokraci, stabilitet dhe prosperitet në pjesë të mëdha të kontinentit.
Autorët pranojnë shqetësimet e vendeve anëtare për vendimmarrjen dhe kohezionin, por theksojnë se zgjerimi mbetet në interesin e të gjithëve. Ata rikujtojnë se që nga viti 2013 nuk është pranuar asnjë anëtar i ri, çka ka krijuar një situatë dekurajuese për vendet kandidate. Në Ballkanin Perëndimor, perspektiva e anëtarësimit nxit reformën, investimet dhe pajtimin.
Rama dhe Vuçiç propozojnë një integrim të përshpejtuar të vendeve të përgatitura në tregun e brendshëm të BE-së dhe në zonën Schengen, pa ndryshuar arkitekturën vendimmarrëse të Unionit. Kjo qasje, sipas tyre, do të sjellë përfitime konkrete për qytetarët dhe do të forcojë pozicionin ekonomik e gjeopolitik të BE-së.
Ata shprehin mirënjohje për mbështetjen financiare dhe dialogun politik të BE-së, por nënvizojnë nevojën për një efekt transformues nga anëtarësimi i plotë. Zgjerimi, sipas artikullit, nuk është akt bamirësie, por investim i ndërsjellë.
Përditësime
Edi Rama dhe Aleksandar Vuçiç e quajnë Ballkanin Perëndimor "vijë e re fronti për investime" dhe hapësirë strategjike në kontekstin e zhvillimeve gjeopolitike të reja.
Në artikullin e tyre të përbashkët, ata sqarojnë se integrimi në BE nuk do të nënkuptojë:
- të drejtën e vetos;
- emërimin e komisionerëve të rinj;
- shtimin e deputetëve në Parlamentin Evropian;
- ndryshime në mekanizmat e votimit.