Në vijim të zhvillimeve lidhur me menaxhimin e mjedisit, 96 organizata të shoqërisë civile kanë depozituar një kërkesë zyrtare pranë Kuvendit të Republikës së Shqipërisë. Dokumenti kërkon ndërhyrje urgjente për rishikimin e politikave qeveritare ndaj zonave të mbrojtura, të cilat u prekën nga ndryshimet e miratuara në shkurt të vitit 2024 në ligjin nr. 81/2017.
Sipas përfaqësuesve të shoqërisë civile, miratimi i ligjit nr. 21/2024 ka krijuar premisa për dëmtimin e ekosistemeve dhe mungesë të transparencës në vendimmarrje. Si rast konkret, organizatat kanë përmendur zhvillimin e një investimi brenda zonës së mbrojtur Peizazhi i Mbrojtur Pishë-Poro Nartë.
Kërkesat konkrete të organizatave ndaj institucioneve ligjvënëse janë:
• Shfuqizimi i menjëhershëm i dispozitave të miratuara me ligjin nr. 21/2024;
• Nisja e një procesi transparent për përafrimin e plotë të ligjit nr. 81/2017 me standardet e Bashkimit Evropian;
• Vendosja e një moratoriumi për dhënien e lejeve për zhvillime të reja turistike dhe infrastrukturore në zonat e mbrojtura, deri në sigurimin e përafrimit të plotë me standardet ndërkombëtare.
Organizatat theksojnë se investimet e kësaj natyre krijojnë konflikte me kosto afatgjata për vendin dhe rrezikojnë të pengojnë procesin e integrimit evropian, duke shpërfillur pjesëmarrjen publike dhe llogaridhënien në vendimmarrjen mjedisore.