Agjencia e Administrimit të Pasurive të Sekuestruara dhe të Konfiskuara (AAPSK) ka publikuar në faqen e saj zyrtare versionet e përditësuara për vitin 2025 të Katalogut të Pasurive të Sekuestruara dhe Katalogut të Pasurive të Konfiskuara. Këta katalogë u publikuan për herë të parë gjatë muajve shkurt dhe mars 2025, ndërsa përditësimi i fundit përfshin të gjitha ndryshimet, zhvillimet dhe lëvizjet deri në fund të vitit, në kuadër të administrimit të pasurive nga agjencia.
Përditësimi përfaqëson vazhdueshmërinë e një procesi të rregullt inventarizimi të pasurive nën administrimin e AAPSK. Katalogët ofrojnë pasqyrë të detajuar mbi pasuritë e sekuestruara dhe të konfiskuara, statusin ligjor të tyre si dhe mënyrën e administrimit. Ndër llojet e pasurive përmenden vila në bregdet, apartamente dhe toka.
Qëllimi i publikimit
Publikimi synon rritjen e transparencës, forcimin e llogaridhënies institucionale dhe garantimin e aksesit të hapur në informacion për qytetarët, institucionet dhe palët e interesuara.
Kryeadministratorja e AAPSK, Risena Xhaja, deklaroi: "Publikimi dhe përditësimi i vazhdueshëm i katalogëve të pasurive të sekuestruara dhe të konfiskuara është një angazhim konkret i AAPSK për transparencë dhe administrim të përgjegjshëm. Për herë të parë, këto pasuri po dokumentohen dhe bëhen publike në mënyrë të strukturuar, duke krijuar një standard të ri në administrimin e tyre dhe duke forcuar besimin e publikut dhe institucioneve në këtë proces".
Sqarime mbi vlerat
AAPSK thekson se vlerat e pasurive në katalogë, të shoqëruara me pasaportat përkatëse, nuk përfaqësojnë vlerën e tregut. Këto vlera janë referuese dhe bazohen në dokumentacionin zyrtar dhe dosjet hetimore. Publikimi shërben për qëllime transparence dhe informimi, pa objektiv shitjen apo tjetërsimin e pasurive.