Agjencia e Administrimit të Pasurive të Sekuestruara dhe Konfiskuara (AAPSK) ka shënuar rritje të ndjeshme të të ardhurave nga menaxhimi i aseteve në pronësi të shtetit gjatë gjashtëmujorit të parë të vitit 2026.
Sipas të dhënave zyrtare, gjatë periudhës janar–qershor 2026, të ardhurat nga qiradhënia e pasurive të sekuestruara dhe të konfiskuara kapën vlerën e 131.5 milionë lekëve, krahasuar me 99.8 milionë lekë në të njëjtën periudhë të vitit 2025. Kjo diferencë përfaqëson një shtim prej 31.7 milionë lekësh, ose 31.7% më shumë në raport me një vit më parë.
Trendi rritës u reflektua edhe në treguesit mujorë. Në muajin qershor të vitit 2026, të ardhurat arritën në rreth 22.9 milionë lekë, ndërsa në të njëjtin muaj të vitit paraardhës vlera ishte 18.2 milionë lekë.
Sipas institucionit, ky rezultat është arritur falë:
• Administrimit më efikas të portofolit të pasurive;
• Zgjerimit të bazës së pasurive të dhëna me qira;
• Zbatimit të një politike aktive për maksimizimin e vlerës ekonomike të aseteve.
AAPSK bëri me dije se të ardhurat e gjeneruara nga ky proces shërbejnë për financimin e institucioneve ligjzbatuese dhe për mbështetjen e projekteve me interes publik, duke garantuar menaxhim transparent dhe profesional të këtyre pasurive.