Këshilli i Ministrave ka miratuar projektligjin për ndryshimin e ligjit nr. 66/2023, i cili reformon rrënjësisht mënyrën e administrimit, zhvillimit dhe përdorimit të objekteve të konfiskuara si ndërtime pa leje. Agjencia e Administrimit të Pasurive të Sekuestruara dhe të Konfiskuara (AAPSK) merr një rol qendror operativ, duke u bërë përgjegjëse për inventarizimin, përshtatjen dhe shitjen e këtyre aseteve.
Roli i AAPSK-së dhe Fondi i Dedikuar
Sipas ndryshimeve, AAPSK do të administrojë objektet për qëllime të interesit publik, strehimit social apo përmes ankandit publik. Për të mbështetur këtë proces, krijohet një “fond i veçantë/i dedikuar për ndërtimet pa leje”, i cili do të financohet nga shitja ose qiradhënia e objekteve, financime të tjera ligjore dhe buxheti i shtetit. Ky fond do të shërbejë për përfundimin e punimeve të mbetura pezull dhe shpenzimet administrative të agjencisë.
Mbrojtja e blerësve dhe pronarëve të truallit
Projektligji siguron mbrojtje për qytetarët që kanë lidhur kontrata noteriale të regjistruara në Kadastër përpara konstatimit të paligjshmërisë së ndërtimit. Blerësit që kanë kryer pagesat përmes sistemit bankar do të gëzojnë njohje të të drejtave të tyre. Për objektet e përfunduara në strukturë, parashikohet legalizimi dhe regjistrimi i tyre sipas legjislacionit në fuqi, ndërsa pronarët e truallit do të kenë të drejtë të marrin njësitë që u takojnë bazuar në kontratat e mëparshme.
Masa ndaj ndërtuesve dhe procedura për ankandet
Projektligji vendos masa strikte ndaj zhvilluesve që kanë tejkaluar lejet e ndërtimit me mbi 10%. Nëse këta subjekte nuk përmbushin detyrimet financiare, AAPSK ka autoritetin të kërkojë bllokimin e llogarive bankare apo aseteve të tyre. Gjithashtu, ndalohet pjesëmarrja në ankandet publike për zhvilluesit, zbatuesit, mbikëqyrësit dhe kolauduesit e objekteve të konfiskuara. Për shpejtimin e proceseve, AAPSK përjashtohet nga tarifat e aplikimit, ndërsa Agjencia e Zhvillimit të Territorit është e detyruar të shqyrtojë kërkesat për leje ndërtimi brenda një afati 90-ditor.
Përditësime
Qeveria zgjeron kompetencat e AAPSK-së për asetet e konfiskuara. Agjencia merr tashmë rolin e përfaqësuesit të shtetit pranë Kadastrës dhe AZHT-së, duke thjeshtuar procedurat e regjistrimit. Sipërfaqet e konfiskuara do të vihen në shërbim të strehimit social ose interesit publik. AAPSK-ja fiton gjithashtu autoritetin për të negociuar zhdëmtimin e palëve të treta me mirëkuptim, duke shmangur proceset e gjata gjyqësore.
Agjencia për Administrimin e Pasurive të Sekuestruara dhe të Konfiskuara (AAPSK) do të marrë në administrim objektet e konfiskuara brenda një afati 30-ditor. Qeveria krijoi një fond të posaçëm ku do të derdhen të ardhurat nga shitja e këtyre aseteve. Sipas rregullores së re, AAPSK do të angazhojë ekspertë të licencuar për vlerësimin financiar të objekteve. Procedura e shitjes kërkon përcjelljen e një relacioni tekniko-financiar te ministri përkatës për miratim. Gjithashtu, vendimi sanksionon detyrimin për publikimin elektronik të të gjitha vendimeve dhe akteve përkatëse në faqen zyrtare të institucionit.