Në tetor, ish-kreu i Prokurorisë së Posaçme Kundër Korrupsionit dhe Krimit të Organizuar, Altin Dumani, raportoi para Kuvendit se Shqipërisë i mungonte një kuadër ligjor për sekuestrimin e pasurive të paligjshme në formë dixhitale, si kriptovalutat. Pavarësisht kësaj, ai njoftoi se Struktura e Posaçme Kundër Korrupsionit dhe Krimit të Organizuar (SPAK) kishte bllokuar 11 milionë euro në kriptovaluta me ndihmën e partnerëve ndërkombëtarë. Dumani theksoi nevojën urgjente për ndërhyrje ligjore që të përcaktojë qartë procedurat për këto pasuri virtuale të konfiskuara.
Në fund të dhjetorit, qeveria prezantoi për konsultim publik një projektligj që parashikon menaxhimin e kriptovalutave të sekuestruara ose të konfiskuara nga organet e drejtësisë. Sipas draftit, AAPSK do të administrojë këto monedha virtuale, sipas vendimeve të gjykatave ose urdhërave të prokurorëve. Projektligji ndryshon ligjin "Për administrimin e pasurive të sekuestruara dhe të konfiskuara".
Një nen i projektligjit cakton Këshillin e Ministrave për të përcaktuar rregullat dhe procedurat e administrimit të këtyre monedhave. Projektligji, i hartuar nga Ministria e Brendshme dhe AAPSK, zgjeron rolin e agjencisë në shitjen, dhënien me qira ose përdorimin e pasurive të sekuestruara. Portofoli i AAPSK do të përfshijë edhe pasuritë e sekuestruara nga pushteti vendor, si ndërtimet pa leje të konfiskuara.
Sipas draftit, AAPSK do të kryejë drejtpërdrejt procedurat e shitjes për pasuritë në administrim, ndryshe nga ligji aktual që kërkon bashkëpunim me institucionet e tjera për shitjen e pronave publike. Për ndërtimet pa leje, parashikohet krijimi i një "Fondi të posaçëm të dedikuar për ndërtimet pa leje", që do të shërbejë për menaxhimin e këtyre objekteve.