**Kryetari i Lidhjes Demokratike të Kosovës (LDK), Lumir Abdixhiku, priti të martën, më 24 mars 2026, në takim ambasadorin e Francës në Kosovë, Olivier Guérot.
Gjatë bisedës, ata diskutuan zhvillimet aktuale politike në vend dhe qëndrimet e LDK-së ndaj tyre. Theksi u vendos në domosdoshmërinë e ruajtjes së stabilitetit institucional dhe në situatën e krijuar rreth çështjes së presidentit.
Në një postim në Facebook, Abdixhiku shkroi se në momente të tilla, respektimi i rendit kushtetues dhe maturia politike mbeten parakushte thelbësore për funksionimin demokratik të vendit.
Ai shprehu mirënjohje për mbështetjen e vazhdueshme që Franca i ka dhënë Kosovës ndër vite, duke vlerësuar rolin e saj në forcimin e stabilitetit, demokracisë dhe orientimit evropian.
Palët biseduan po ashtu për thellimin e bashkëpunimit dypalësh në fusha me interes të përbashkët, veçanërisht në ekonomi, zhvillim dhe integrim evropian. Kosova mbetet e përkushtuar në rrugën euro-atlantike, ndërsa partneriteti me Francën është thelbësor për këtë rrugëtim.