Kryetari i Lidhjes Demokratike të Kosovës (LDK), Lumir Abdixhiku, ka pritur në takim ambasadorin e Gjermanisë në Kosovë, Rainer Rudolph, për të biseduar mbi zhvillimet politike pas procesit zgjedhor. Sipas njoftimit zyrtar të LDK-së, në fokus të bisedës ishin pritjet për certifikimin e rezultateve nga Komisioni Qendror i Zgjedhjeve (KQZ) dhe hapat e mëtejmë drejt konstituimit të institucioneve të reja të Republikës së Kosovës.
Gjatë takimit, Abdixhiku theksoi rëndësinë e respektimit të proceseve demokratike. Ai nënvizoi se, menjëherë pas certifikimit të rezultateve, duhet të punohet me përgjegjësi për krijimin e institucioneve funksionale, në përputhje me vullnetin e qytetarëve dhe interesin shtetëror.
Kreu i LDK-së vlerësoi se vendi ka nevojë për stabilitet politik dhe institucional, duke vënë theksin te rëndësia e bashkëpunimit ndërinstitucional në fazën e ardhshme. Në përmbyllje, Abdixhiku shprehu mirënjohjen ndaj shtetit gjerman për mbështetjen e vazhdueshme që i ka ofruar Kosovës ndër vite në proceset e shtetndërtimit dhe zhvillimit.