Agim Ademi, kryetar i Federatës së Futbollit të Kosovës, ka falënderuar Federatën e Sllovakisë dhe të tjerët pas fitores 4-3 të Kosovës në Bratislavë. Kjo fitore i siguroi Kosovës vendin në finalen e play-off-it për kualifikim në Botëror, ku të martën do të luajë kundër Turqisë në stadionin Fadil Vokrri.
Në një postim në rrjetet sociale, Ademi shprehu mirënjohje për mikpritjen dhe fair-play-in e Federatës sllovake. Ai vlerësoi profesionalizmin e organeve të rendit që nga aeroporti deri në fund të vizitës.
Ademi falënderoi publikun në stadium për respektimin e simboleve dhe himnit të Republikës së Kosovës. Ai përmendi qytetarët e Bratislavës për mikpritjen ndaj bashkatdhetarëve që këndonin dhe brohorisnin nëpër kafiteri, si dhe pronarët e tyre për krijimin e një atmosfere ku frymonte shqip me këngë dhe emocione.
Në fund, Ademi u drejtoi falënderime Dardanëve për përkrahjen: "Kosova është e të gjithëve dhe së bashku do ta çojmë përpara!".
Postimi i plotë:
Mirëmëngjes, Kosovë!
Dua të ndaj publikisht falënderimin për Federatën e Sllovakisë për mikpritjen dhe për fair-play-in gjatë ndeshjes.
Po ashtu, një falënderim i veçantë shkon për organet e rendit, të cilat na kanë përcjellë me korrektësi dhe profesionalizëm të lartë, që nga aeroporti e deri në përfundim të vizitës sonë.
Faleminderit publikut në stadium që respektoi simbolet tona dhe himnin e Republikës së Kosovës.
Një mirënjohje e sinqertë edhe për qytetarët e Bratislavës, të cilët mikpritën bashkatdhetarët tanë që këndonin dhe brohorisnin nëpër kafiteri.
Falënderim për të gjithë pronarët e kafiterive, të cilët gjatë këtyre dy ditëve krijuan një atmosferë ku frymonte shqip, me këngë dhe emocione të paharrueshme.
Dhe mbi të gjitha, faleminderit të gjithë Dardanëve për përkrahjen!
Kosova është e të gjithëve dhe së bashku do ta çojmë përpara!