Tifo-grupi Dardanët i Kombëtares së Kosovës kanë bërë të ditur se kanë organizuar një vendtakim për të gjithë tifozët para ndeshjes play-off mes Sllovakisë dhe Kosovës, e cila zhvillohet të enjten në Bratisllavë.
Sipas njoftimit, tifozët, pa dallim sektori ku kanë bileta, ftohen të mblidhen në lokacionin Gelato Point, Laurinská 780/2, 811 01 Staré Mesto, Slovakia, nga ora 14:00 deri në 17:45. Kjo masë synon të shmangë lëvizjet e shpërndara në kryeqytetin sllovak dhe të krijojë një atmosferë të përbashkët mbështetëse.
Prej aty, grupi do të marshojë së bashku drejt stadiumit. Dardanët kanë theksuar interesin e madh të tifozëve për këtë ndeshje, e cila shihet si mundësi për një kapitull të ri në historinë e ekipit kombëtar.
Në njoftim thuhet se tifozët dhe futbollistët do të bashkëpunojnë për fitore, ndërsa në Bratisllavë pritet të dëgjohet zëri i fortë i mbështetësve kosovarë. Tifo-grupi ka kërkuar shpërndarjen e informacionit për të siguruar pjesëmarrje sa më të gjerë.
Përditësime
Dardanët publikuan njoftimin e plotë për tifozët: „Është një ndeshje historike dhe besojmë se bashkë mund ta bëjmë të ndjeshme mbështetjen për djemtë tanë në fushën e blertë. Të enjten në Bratislava do të dëgjohet kushtrimi i popullit kosovar. Besa-besë, si kaherë, ballëlartë dhe me duar në zemër, për Kosovën dhe për të ardhmen e saj!“