Një incident ajror ka ndodhur në qendër të kryeqytetit kinez, ku një aeroplan i vogël është përplasur me ndërtesën më të lartë të qytetit, CITIC Tower. Pamjet e shpërndara në rrjetet sociale tregojnë mbetje të aeroplanit që bien nga qiellgërvishtësi, duke shkaktuar dëme materiale edhe në automjete të parkuara në tokë.
Sipas të dhënave paraprake, mjeti i përfshirë në përplasje është një avion i tipit Sunward SA 60L Aurora, i cili besohet se është në pronësi të një kompanie lokale të aviacionit të përgjithshëm. Të dhënat jozyrtare, duke përfshirë informacionet nga Flightradar24, sugjerojnë se avioni mund të ketë devijuar nga trajektorja e planifikuar e fluturimit për arsye ende të paqarta.
Pas përplasjes, autoritetet kanë nisur procedurat e evakuimit të personave që ndodheshin brenda ndërtesës 109-katëshe. Në vendngjarje janë vendosur forca të shumta të policisë, zjarrfikësve dhe autoambulancave për të menaxhuar situatën. Përplasja ka nxitur reagime të shumta, duke marrë parasysh faktin se Pekini zbaton kontrolle shumë të rrepta mbi hapësirën ajrore, veçanërisht mbi zonat ku ndodhen objekte strategjike. Hetimet për të përcaktuar shkaqet e sakta të incidentit dhe pasojat e plota janë duke vazhduar.
Përditësime
Autoritetet konfirmuan se piloti Liu Junhua po drejtonte avionin sportiv me regjistrim B-12PP gjatë incidentit të së premtes. Avioni, i cili u nis nga Aeroporti Xifosi në orën 17:30, u përplas me CITIC Tower rreth orës 18:00. Nga përplasja u dëmtuan dy xhama të ndërtesës dhe u shkaktua tym në katin përdhes, por fatmirësisht nuk ka persona të lënduar.
Autoritetet konfirmuan vdekjen e pilotit pas përplasjes së një aeroplani sportiv në CITIC Tower në Pekin, e ndodhur në orën 17:55. Si pasojë e rrënojave, 13 persona në tokë kanë mbetur të lënduar. Ekuipazhet e emergjencës kanë rrethuar zonën e dëmtuar të fasadës për të garantuar sigurinë.
Autoritetet kineze kanë nisur një operacion të gjerë censure për të fshirë çdo material mbi incidentin nga rrjetet sociale. Njëkohësisht, ekipet teknike kanë mbuluar fasadën e dëmtuar të CITIC Tower me panele për të fshehur pasojat e përplasjes. Ndërtesa, ku ndodhen zyrat e CITIC Group dhe Alibaba, ndodhet pranë kompleksit qeveritar Zhongnanhai, duke nxitur pikëpyetje mbi masat e sigurisë në zonë.
Për shkak të censurës qeveritare, CCTV dhe mediat e tjera shtetërore kineze heshtën pas përplasjes së aeroplanit sportiv në CITIC Tower. Afërsia e selisë së CCTV me vendin e incidentit ishte një faktor kyç në bllokimin e raportimit, ndërsa informacionet zyrtare u publikuan vetëm të shtunën pasdite.