Agron Shehaj, kryetar i Partisë Mundësia, gjatë qëndrimit në Uashington, zhvilloi një takim në zyrat qendrore të Institutit Ndërkombëtar Republikan, ku u prit nga Stephen Nix, drejtor për Europën dhe Azinë.
Gjatë bashkëbisedimit, Shehaj theksoi se qytetarët shqiptarë presin ndryshimin dhe largimin e qeverisë së tanishme, si dhe një të ardhme me drejtësi të pavarur. Ai u shpreh: "Ndryshim, ndryshim, ndryshim. Kjo është ajo që presin shqiptarët. Sistemi 35-vjeçar u ka mohuar të drejtën të ndërtojnë të ardhmen në vendin e tyre. Një grusht njerëzish që kanë marrë peng jetën politike dhe të ardhmen e vendit. Partia Mundësia nuk ndalet. Shqiptarët kanë nevojë për një qeveri të pakorruptuar, dhe sot drejtësia është në anën e tyre."
Kjo është dita e katërt e vizitës së Shehaj në SHBA. Më parë, ai zhvilloi takime në rezidencën Mar-a-Lago të presidentit amerikan Donald Trump, si dhe me kongresmenë amerikanë. Gjatë këtyre bisedave, Shehaj foli për problemet që pengojnë zhvillimin e Shqipërisë dhe për projektin politik të Partisë Mundësia në lidhje me të ardhmen e shqiptarëve.
Në rrjetet sociale, Shehaj falënderoi IRI-në për bashkëpunimin e deritanishëm me Partinë Mundësia dhe ndihmën për forcimin e alternativës politike të saj.