Agron Shehaj, kryetar i Partisë Mundësia, deklaroi se pothuajse çdo ditë përfaqësues të vendeve perëndimore vizitojnë SPAK-un për të shprehur mbështetjen në luftën kundër korrupsionit. Ndër të tjerë, përmendi Ngarkuarën me Punë të SHBA-së, ambasadorët gjerman, italian, hollandez, francez dhe anglez.
Sipas tij, i njëjti institucion sulmohet nga klasa politike e vjetër shqiptare, si Edi Rama, Sali Berisha, Ilir Meta, Erion Veliaj dhe Belinda Balluku, së bashku me gazetarët dhe opinionistët e tyre në media.
Shehaj theksoi se politikanët që kanë mbajtur poste të rëndësishme në 35 vitet e fundit duhet të dalin përpara drejtësisë. Ai shpalli nisjen e fushatës për mbledhjen e 100 mijë firmave në mbështetje të drejtësisë dhe kundër pandëshkueshmërisë.
Deri tani janë mbledhur pothuajse 20 mijë firma, kurse mungojnë 80 mijë të tjera. Këto nënshkrime do t’i dërgojnë Kongresit amerikan si dëshmi e vullnetit qytetar për drejtësi të pavarur.
Ai bëri thirrje qytetarëve të marrin anë qartë në krah të drejtësisë duke firmosur masivisht.