Gjatë tri javëve të fundit, ekipet e medias që po ndjekin protestat në kryeqytet janë përballur me fyerje, sulme verbale dhe tentativa për pengimin e punës së tyre profesionale. AGSH ka reaguar publikisht për të tretën herë, duke theksuar se gazetarët, operatorët dhe punonjësit e medias nuk janë palë në këto tubime, por po ushtrojnë detyrën e tyre për të informuar publikun.
Sipas deklaratës së organizatës, çdo akt intimidues ndaj reporterëve përbën një shkelje të sigurisë personale të tyre dhe cenim të drejtës së qytetarëve për t'u informuar. Ndërsa AGSH vlerëson se kritika ndaj raportimit mediatik është pjesë e debatit demokratik, ajo thekson se kjo nuk duhet të shndërrohet në gjuhë urrejtjeje ose dhunë fizike.
Organizata u ka bërë thirrje organizatorëve të protestave dhe pjesëmarrësve që të tregojnë vetëpërmbajtje dhe të kontribuojnë në ruajtjen e një ambienti të sigurt për mediat. Njëkohësisht, AGSH i ka kërkuar Policisë së Shtetit që të marrë masa konkrete, duke përfshirë vlerësimin e rreziqeve dhe ofrimin e mbështetjes së nevojshme për ekipet që ndodhen në terren. Në përfundim, AGSH u ka rikujtuar vetë gazetarëve rëndësinë e zbatimit të standardeve etike dhe profesionale gjatë raportimit, për të ruajtur besueshmërinë dhe interesin publik.