Shoqata e Gazetarëve Profesionistë të Shqipërisë (APJA) u kërkoi më 19 tetor Policisë së Shtetit, Agjencisë së Mbikëqyrjes Policore dhe Prokurorisë së Tiranës të hetojnë të paktën 21 raste të denoncuara publikisht për dhunë, kërcënime dhe pengim të gazetarëve gjatë protestave kundër qeverisë. Protestat studentore nisën në Tiranë më 13 tetor, ndërsa rastet më të fundit të përmendura nga shoqata lidhen me protestat e 17 dhe 18 tetorit.
Sipas APJA-së, gazetarë, kameramanë dhe fotoreporterë kanë denoncuar pengim të raportimit dhe dhunë, kryesisht nga punonjës policie, por edhe nga protestues. Shoqata tha se përsëritja e incidenteve tregon se ato nuk mund të konsiderohen më raste të izoluara.
Mes denoncimeve janë ato të gazetarëve Glidona Daci të Klan News dhe Klodiana Lala të News24 për ndërhyrje policore, pengim të raportimit dhe kufizim të filmimeve. Taulant Kopliku, drejtues i emisionit “Piranjat”, tha se më 18 tetor një punonjës policie e goditi teksa filmonte pranë selisë së Partisë Socialiste, i mori telefonin dhe fshiu pamjet. Izmir Akulli, kryeredaktor i Dosja.al, denoncoi se u dhunua gjatë filmimit dhe mori ndihmë mjekësore në spital.
Denoncime për pengim ose dhunë nga policia kanë bërë edhe Elkier Bushkolaj, Renaldo Salianji, Anesti Bajramemaj dhe operatori Henri Simota. Operatori i News24 Elvin Kamberi u lëndua nga një granatë zhurmuese e hedhur nga policia në zonën ku ndodheshin gazetarët. Gazetari Xhoi Malësia i Top News tha se një efektiv i Forcave të Ndërhyrjes së Shpejtë i drejtoi një granatëhedhës për bombola lotsjellëse.
Shoqata përmendi edhe sulme të raportuara nga protestues. Një ekip i Report TV, përfshirë gazetaren Raziela Myslymaj, u përball me persona të maskuar që tentuan të dëmtonin kamerën. Doriana Bezat e Top Channel raportohet se u sulmua gjithashtu. Vjolanda Peca e Citizens.al dhe Fatime Halmusaj e Fax News u lënduan nga gurë dhe sende të forta. APJA përmendi edhe pengime të raportuara nga punonjës të Euronews Albania, Ora News dhe Syri TV, përfshirë shoqërimin me forcë të operatorit Albi Muçollari.
Më vete, Qendra Europiane për Lirinë e Shtypit dhe Medias (ECPMF), duke iu referuar të dhënave të Shoqatës së Gazetarëve të Shqipërisë (AGSH), tha se nga 15 deri më 18 tetor ishin dokumentuar të paktën 25 incidente. Sipas AGSH-së, shumica lidheshin me veprime të raportuara të policisë, dy me sulme nga protestues dhe një me pengimin e gazetarëve nga persona të maskuar në prani të drejtorit të Përgjithshëm të Policisë, Skënder Hita.
ECPMF i kërkoi Hitës të marrë masa për sigurinë e gazetarëve dhe të nisë dialog me organizatat mediatike për hartimin e protokolleve që përcaktojnë identifikimin dhe mbrojtjen e tyre, parandalimin e ndërhyrjeve dhe reagimin ndaj incidenteve. Organizata kërkoi hetime të pavarura dhe të paanshme për punonjësit e policisë të përfshirë në abuzime. APJA kërkoi verifikimin e denoncimeve dhe identifikimin e përgjegjësve, si dhe masa nga Ministria e Brendshme dhe Policia e Shtetit. Ajo u bëri thirrje edhe organizatorëve dhe pjesëmarrësve në protesta të respektojnë sigurinë e gazetarëve dhe pajisjet e tyre.