Asociacioni i Gazetarëve të Shqipërisë (AGSH) dokumentoi të paktën 11 incidente që prekën gazetarë, operatorë dhe ekipe mediatike gjatë protestave të studentëve në Tiranë, më 13, 14 dhe 15 tetor 2026. Bilanci u rrit nga 10 incidente të dokumentuara për dy ditët e para, pas sulmit të raportuar ndaj gazetares së Top Channel, Doriana Bezat, më 15 tetor. Sipas AGSH-së, nëntë nga incidentet e mëparshme lidhen me veprime të raportuara të Policisë së Shtetit, ndërsa një me sulmin e protestuesve të maskuar ndaj një ekipi mediatik. Të paktën tre punonjës të medias pësuan dëmtime fizike.
Më 14 tetor, AGSH dokumentoi pesë incidente: katër të lidhura me veprimet e policisë dhe një me sulmin ndaj ekipit të Report TV. Gazetarja e Euronews Albania, Enkelejda Mema, u pengua nga efektivë policie të filmonte dhe të raportonte. Në një rast tjetër, një efektiv i mori telefonin gazetares së Euronews Albania, Alice Taylor, teksa ajo fotografonte protestën. Sipas dëshmisë së saj për AGSH-në, telefoni iu kthye pas disa minutash, pas ndërhyrjes së një kolegu të efektivit dhe të protestuesve që konfirmuan se ajo ishte gazetare.
Operatori i News24, Elvin Kamberi, u lëndua teksa filmonte përplasjet mes policisë dhe protestuesve. Sipas informacionit të marrë nga AGSH, lëndimi ndodhi kur policia hodhi një granatë zhurmuese drejt zonës ku ndodheshin operatorë dhe fotografë. Organizata kërkoi sqarimin e rrethanave dhe verifikimin e përdorimit të mjetit pranë ekipeve mediatike.
Protestues të maskuar sulmuan kamerën e ekipit të Report TV, duke e shkelmuar dhe rrëzuar në tokë. Sipas televizionit, kamera u la jashtë përdorimit. Gazetarja Raziela Myslymaj u kërkoi protestuesve të largoheshin nga objektivi. AGSH kërkoi identifikimin e autorëve dhe hetimin e ngjarjes. Shoqata e Gazetarëve Evropianë (AEJ) dënoi gjithashtu sulmin dhe kërkoi identifikimin e autorëve.
Pesë rastet e tjera të dokumentuara nga AGSH ndodhën më 13 tetor. Organizata përmendi dhunë të raportuar ndaj gazetarit të A2 CNN, Anesti Bajramemaj, dhe operatorit Heri Simota. Gazetarja Fatime Halmusaj u lëndua në këmbë nga një mjet tymues i hedhur nga policia. Sipas denoncimit publik të drejtuesit të Dosja.al, kryeredaktori Izmir Akulli u dhunua nga disa efektivë policie pranë Bankës së Shqipërisë.
Më 15 tetor, AGSH dënoi sulmin e raportuar ndaj gazetares së Top Channel, Doriana Bezat, dhe kërkoi identifikimin e personave përgjegjës dhe hetimin e rrethanave. AGSH u kërkoi Policisë së Shtetit, Agjencisë së Mbikëqyrjes Policore dhe Prokurorisë të verifikojnë e hetojnë rastet e dokumentuara dhe të marrin masa për sigurinë e gazetarëve gjatë protestave.
Përditësime
AGSH dënoi sulmin e raportuar ndaj gazetares së Top Channel, Doriana Bezat, dhe kërkoi identifikimin e përgjegjësve e hetimin e rrethanave.