Në prag të zgjedhjeve nacionale në Kosovë, Agjencia për Informim dhe Privatësi (AIP) ka përsëritur thirrjen drejtuar partive dhe subjekteve politike për respektimin e privatësisë dhe mbrojtjen e të dhënave personale të qytetarëve gjatë procesit zgjedhor që do të mbahet më 7 qershor.
Sipas njoftimit të AIP-së, subjektet politike kanë detyrimin që të sigurojnë përputhshmëri të plotë me kërkesat ligjore, duke ndjekur këto udhëzime:
• Të sigurojnë që çdo përpunim i të dhënave të ketë bazë ligjore, siç është pëlqimi i qytetarëve ose interesi legjitim.
• Të mos përdorin të dhënat kontaktuese të mbledhura gjatë ushtrimit të detyrave publike për qëllime të marketingut politik.
• Të ndërpresin dërgimin e mesazheve (SMS), e-maileve apo thirrjeve telefonike për personat që nuk kanë dhënë pëlqimin ose që kanë shprehur kundërshtim.
• Të shmangin çdo formë të profilizimit apo përpunimit masiv të të dhënave të ndjeshme, përveç rasteve kur ekziston bazë e qartë ligjore dhe janë ndërmarrë masat mbrojtëse të duhura.
• Të respektojnë të drejtën e qytetarëve për të kundërshtuar në çdo kohë përdorimin e të dhënave të tyre për marketing të drejtpërdrejtë.
Ky reagim institucional synon të ruajë integritetin e procesit zgjedhor dhe të garantojë besimin e qytetarëve të Republikës së Kosovës në mbrojtjen e privatësisë së tyre gjatë periudhës së fushatës.