Grupi për Studime Juridike dhe Politike (GLPS) njoftoi më 17 gusht 2026 se ka parashtruar një ankesë zyrtare në Agjencinë për Informim dhe Privatësi (AIP), pas dështimit të Zyrës së Kryeministrit (ZKM) për t’iu përgjigjur një kërkese për qasje në dokumente publike. Më 6 gusht 2026, GLPS kishte kërkuar nga ZKM listën e anëtarëve të Qeverisë që kanë dhënë dorëheqje pas zgjedhjes së tyre si deputetë, datat e dorëheqjeve, si dhe vendimet përkatëse.
Sipas GLPS-së, kërkesa bazohet në paragrafin 1 të nenit 26 të Ligjit për Qeverinë, i cili detyron ministrat që zgjidhen deputetë të japin dorëheqje përpara ditës së certifikimit të rezultateve zgjedhore. Organizata thekson se neni 72 i Kushtetutës së Republikës së Kosovës ndalon ushtrimin e njëkohshëm të këtyre dy funksioneve, qëndrim ky i mbështetur edhe në vendimin P.A.nr.09/2025 të Gjykatës Supreme, të datës 25 qershor 2025.
Organizata vlerëson se moskthimi i përgjigjes brenda afatit ligjor prej shtatë ditësh përbën shkelje të obligimeve ligjore dhe cenon parimet e transparencës dhe llogaridhënies institucionale. Përmes ankesës në AIP, GLPS kërkon që ZKM të obligohet të ofrojë informacionet e kërkuara. Organizata u ka bërë thirrje institucioneve që të informojnë publikun pa vonesa mbi statusin e anëtarëve të kabinetit të zgjedhur deputetë, duke argumentuar se institucionet janë të detyruara të veprojnë në përputhje me ligjin dhe të japin llogari për veprimet apo mosveprimet e tyre.