Instituti i Kosovës për Drejtësi (IKD) prezantoi sot raportin “Llogaridhënia dhe transparenca e organeve kolegjiale, peng i LPPA-së”, i cili analizon pengesat ligjore për monitorimin e punës së bordeve dhe komisioneve në institucionet publike. Hulumtuesit theksuan se neni 39.2 i Ligjit për Procedurën e Përgjithshme Administrative (LPPA) krijon një paradoks ligjor, duke e vendosur mbylljen e mbledhjeve si rregull, përveç nëse një ligj tjetër përcakton shprehimisht të kundërtën.
Hulumtuesi i lartë, Gëzim Shala, sqaroi se kjo dispozitë u pamundëson mediave dhe shoqërisë civile monitorimin e proceseve vendimmarrëse, madje edhe në raste kur institucionet kanë vullnet për të qenë transparente. Sipas tij, për sa kohë ligji nuk e lejon hapjen, institucionet rrezikojnë shkeljen e normave ligjore nëse vendosin t’i zhvillojnë mbledhjet në prani të publikut. Shqiponjë Gashi, hulumtuese në IKD, theksoi se qasja në dokumente apo procesverbale pas përfundimit të mbledhjes nuk e zëvendëson monitorimin e drejtpërdrejtë, pasi procesverbalet nuk pasqyrojnë diskutimet, kundërshtimet apo mënyrën se si është formuar shumica për vendimet.
Raporti evidenton se kjo problematike prek institucione kyçe, si Bordi Drejtues i ShSKUK-së, Autoriteti i Konkurrencës, Komisioni i Pavarur për Miniera dhe Minerale dhe Bordi i ARKEP-it. Për shembull, vetëm për vitin 2026, ShSKUK menaxhon një buxhet prej afro 198 milionë eurosh, ndërsa vendimet e bordit ndikojnë drejtpërdrejt në cilësinë e shërbimeve shëndetësore dhe sigurinë e pacientëve.
IKD qartësoi se nuk kërkon hapjen e pakushtëzuar të çdo mbledhjeje, duke pranuar se mbyllja është e nevojshme kur trajtohen të dhëna personale, informata të klasifikuara, sekrete afariste apo çështje të sigurisë. Megjithatë, kërkesa e tyre kryesore është ndryshimi i LPPA-së për të përcaktuar hapjen si parim dhe mbylljen si përjashtim të arsyetuar. Instituti kërkon që Qeveria të iniciojë këtë ndryshim ligjor, të cilin më pas duhet ta miratojë Kuvendi i Kosovës.