Grupi për Studime Juridike dhe Politike (GLPS) ka mbajtur një konferencë për media me 30 qershor 2026, ku analizoi pasojat e mospërmbushjes së Agjendës së Reformave në kuadër të Planit të Rritjes për Ballkanin Perëndimor. Sipas GLPS-së, data e sotme shënon përfundimin e periudhës shtesë njëvjeçare (grejs periudhë), gjatë së cilës institucionet e Kosovës kishin mundësi të realizonin 13 hapat e parashikuar për të shmangur sanksionet.
Ema Pula, menaxhere e programeve në GLPS, deklaroi se pasojat financiare për 90.6 milionë eurot e dedikuara për këtë semestër tani janë bërë të pakthyeshme. Ajo theksoi se procesi nuk është thjesht çështje administrative, por ndikon drejtpërdrejt në interesin publik, duke zvogëluar investimet në ekonomi dhe duke kufizuar mundësitë zhvillimore të shtetit.
Hulumtuesi Besar Gërgi vuri në dukje se mungesa e konsensusit politik për ndërtimin e institucioneve funksionale ka qenë faktori kryesor që ka penguar zbatimin e reformave. GLPS-ja kishte paralajmëruar për këtë skenar që prej 2 majit 2025, duke u bërë thirrje autoriteteve për ratifikimin e marrëveshjeve dhe koordinim institucional. Organizata pret që së shpejti të ketë një qartësi të plotë mbi shumën e saktë të fondeve që do të humbasin përfundimisht si pasojë e vonesave.