Ministri i Brendshëm, Besfort Lamallari, u ka bërë thirrje të rinjve të aplikojnë për programin e studimit Bachelor "Siguria dhe Hetimi" në Akademinë e Sigurisë, duke e cilësuar shërbimin në Policinë e Shtetit si një mision në mbrojtje të qytetarëve. Ky program synon plotësimin e nevojave për burime njerëzore në strukturat drejtuese të Policisë së Shtetit, duke garantuar një proces përzgjedhjeje bazuar në meritokraci.
Sipas njoftimit zyrtar, procesi i përzgjedhjes së kandidatëve përfshin vlerësimin administrativ, testimin fizik, intervistën me gojë, testimin psikologjik, kontrollin mjekësor dhe verifikimin e besueshmërisë. Rezultatet do të bazohen në tri kritere kryesore:
• Nota mesatare e shkollës së mesme (50%)
• Testimi fizik (30%)
• Intervista me gojë (20%)
Testimet do të zhvillohen nga data 5 deri më 19 gusht 2026. Lista paraprake e rezultateve do të publikohet më 22 gusht, ndërsa kandidatët kanë të drejtë ankimi në datat 24-25 gusht. Lista përfundimtare e fituesve shpallet më 26 gusht 2026. Kandidatët që do të shpallen fitues do të nënshkruajnë një kontratë për të shërbyer në strukturat e Policisë së Shtetit për një periudhë prej të paktën tri vitesh pas diplomimit. Regjistrimet do të vijojnë nga data 26 gusht deri më 8 shtator 2026.