Rreth 1000 kandidatë vijojnë garën për t’u bërë pjesë e Policisë së Shtetit në Patrullën e Përgjithshme. Ata po i nënshtrohen testimeve mjekësore, fizike dhe psikologjike në Akademinë e Sigurisë, të cilën e vizitoi drejtori i përgjithshëm i Policisë së Shtetit, Skënder Hita.
Gjatë takimit me kandidatët, Hita i falënderoi për interesin dhe besimin ndaj institucionit. Ai tha se në fazën fillestare kishin aplikuar rreth 1300 persona, ndërsa pas fazës së parë rreth 1000 kandidatë vijojnë konkurrimin. Sipas tij, numri i aplikantëve është një tregues pozitiv dhe motivim për të forcuar kapacitetet njerëzore dhe për të ndërtuar një polici gjithnjë e më profesionale.
Hita u uroi suksese kandidatëve në fazat e mëtejshme dhe i nxiti të angazhohen për të përmbushur kriteret e për t’u kualifikuar brenda kuotave të përcaktuara. Ai tha se procesi i përzgjedhjes do të vijojë në mënyrë transparente deri në përfundim dhe do të garantojë mundësi të barabarta për të gjithë pjesëmarrësit.
Kreu i Policisë së Shtetit u kërkoi kandidatëve ta shohin mundësinë e pranimit si një privilegj për të dëshmuar aftësitë dhe vullnetin për t’iu shërbyer qytetarëve me profesionalizëm e përgjegjshmëri. Përzgjedhja do të vijojë sipas procedurave të përcaktuara; në Patrullën e Përgjithshme do të pranohen kandidatët që plotësojnë kriteret dhe kualifikohen brenda kuotave.