Agim Shahini, kryetar i Aleancës Kosovare të Bizneseve (AKB), ka shprehur shqetësimin për situatën në Ngushticën e Hormuzit, ku forcat detare të Iranit kanë paralajmëruar se anijet nuk lejohen të kalojnë.
Sipas raportimeve ndërkombëtare, qindra cisterna dhe tankerë janë ndalur ose po presin pranë rajonit, me potencial bllokimi të qindra milionë deri në 1 miliard fuçi naftë.
Ngushtica e Hormuzit transporton rreth 20% të furnizimit global me naftë. Kjo naftë vjen kryesisht nga vendet e Gjirit Persik:
- Arabia Saudite,
- Emiratet e Bashkuara Arabe,
- Kuvajti,
- Irani,
- Iraku.
Destinacionet kryesore janë Evropa, Kina, India, Japonia dhe vendet e tjera të Azisë.
Shahini vlerëson se bllokimi mund të shkaktojë rritje të menjëhershme të çmimeve të derivateve, goditje për transportin dhe industrinë globale, si dhe ndikim të drejtpërdrejtë në ekonominë e Kosovës, pasi vendi nuk posedon rezerva të mjaftueshme të derivateve.
AKB thekson se zhvillimet gjeopolitike dhe ushtarake ndikojnë drejtpërdrejt në stabilitetin ekonomik dhe kërkon nga institucionet e Kosovës të jenë të përgatitura për çdo skenar në tregun e energjisë. “Nafta është siguri ekonomike e një shteti”, ka thënë Shahini.